ඒමන්ති මාරඹේ
රුසියාවේ ශාන්ත පීටර්ස්‌බර්ග් වෛද්‍ය විද්‍යාලයේ වෛද්‍ය උපාධිය හැදෑරීම සඳහා සෞඛ්‍ය අමාත්‍යාංශය හරහා වැටුප් සහිත අධ්‍යයන නිවාඩු ලබාගෙන එම අධ්‍යයන කටයුතුවල නිරත නොවී පෞද්ගලික වෛද්‍ය සේවයේ යෙදුණු රජයේ ලියාපදිංචි හා සහකාර වෛද්‍ය නිලධාරීන් 70 දෙනකුට එරෙහිව අමාත්‍යාංශ මට්‌ටමේ පරීක්‌ෂණයක්‌ පවත්වන්නැයි සෞඛ්‍ය අමාත්‍යාංශයෙන් ඉල්ලා සිටින බව රජයේ වෛද්‍ය නිලධාරීන්ගේ සංගමය පවසයි.
අදාළ ලියාපදිංචි හා සහකාර වෛද්‍ය නිලධාරීන් පිරිස පූර්ණකාලීන නේවාසික වෛද්‍ය පාඨමාලාවක්‌ හැදෑරූ බව පවසමින් රුසියානු වෛද්‍ය පීඨයකින් ලබාගත් වංචනික සහතික ඉදිරිපත් කළද එම සහතික පිළිගැනීම ශ්‍රී ලංකා වෛද්‍ය සභාව විසින් ප්‍රතික්‌ෂේප කර ඇතැයි වෛද්‍ය නිලධාරීන්ගේ සංගමයේ උප ලේකම් වෛද්‍ය උපුල් ගුණසේකර මහතා පැවසීය.
මේ අනුව අදාළ පිරිසට එරෙහිව වංචනික සහතික ඉදිරිපත් කිරීමේ වරද සම්බන්ධයෙන් විනය පියවර ගැනීමට වෛද්‍ය සභාව පියවර ගත යුතු යෑයි ඔහු අවධාරණය කළේය.
වසර හයක පිළිගත් වෛද්‍ය උපාධියක්‌ විදේශීය රටකින් ලබාගෙන තිබුණේ නම් අදාළ පිරිස වෛද්‍යවරුන් වී තමන් සමග සේවයේ යෙදීමට ඉඩ තිබූ බව කී වෛද්‍ය ගුණසේකර එහෙත් ඔවුන් එම අවස්‌ථාව පැහැර හරිමින් ශ්‍රී ලංකාවේ පිහිටි ආයතනයක මාස හයක කාලයක්‌ අධ්‍යාපනය ලබාගත් බවට පෙන්වූ වෛද්‍ය උපාධි සහතික වංචනික ඒවා බව වෛද්‍ය සභාව හා පොලිස්‌ දෙපාර්තමේන්තුව විසින් වෙන් වෙන්ව පැවැත්වූ පරීක්‌ෂණවලදී තහවුරු වූ බව සඳහන් කළේය.
මෙවැනි වංචනික වෛද්‍ය උපාධි සහතික ඉදිරිපත් කරන පිරිසක්‌ වෛද්‍ය සභාවේ වෛද්‍යවරුන් ලෙස ලියාපදිංචි නොකළ යුතු බව වත්මන් අගවිනිසුරු ශිරාණි බණ්‌ඩාරනායක මහත්මිය විසින් එවකට නඩු තීන්දුවක්‌ ලබාදී ඇති අතර එය ශේ්‍රෂ්ඨාධිකරණ නඩු අංක 39/2006 මගින් පැහැදිලිව දක්‌වා ඇතැයිද වෛද්‍ය ගුණසේකර මහතා වැඩිදුරටත් සඳහන් කළේය. කොළඹ රජයේ වෛද්‍ය නිලධාරීන්ගේ සංගම් මූලස්‌ථානයේ ඊයේ (31 වැනිදා) පැවැති ප්‍රවෘත්ති සාකච්ඡාවකදී ඔහු මෙම කරුණු අනාවරණය කළේය.
Divaina 2011.11.01
No comments:
Post a Comment