සාමය රැකීමට එස්‌.ටී.ෆ්. සහ පොලිසිය යොදවයි
හේමන්ත රන්දුණු ,කරන්දෙණිය -ඇල්පිsටිය සහ අහුන්ගල්ල
ප්‍රකෝපකාරී ලෙස හැසිරුණු පිරිසගේ ප්‍රහාරයට ලක්‌වීමෙන් වෛද්‍යවරයාගේ ඝාතනයට සම්බන්ධ ප්‍රධාන සැකකරුගේ නිවස සහ තවත් නිවසක්‌ ගිනිගෙන විනාශ වී තිබූ අයුරු
කරන්දෙණිය සහ අවට ප්‍රදේශවලින් පැමිණි දස දහසකට ආසන්න පිරිසක්‌ කලහකාරී ලෙස හැසිරෙමින් සැකකරුවන්ගේ දේපොළ ගිනි තබා විනාශ කරමින් පැය ගණනක්‌ තිස්‌සේ කරන්දෙණිය නගරය සියතට ගනිමින් සිටියහ. කලහකාරී පිsරිස්‌ පලවා හැරීමට පොලිසිය සහ පොලිස්‌ විශේෂ කාර්ය බළකාය දැඩි උත්සාහයක නිරත වුවද එය පාලනය කිරීමට නොහැකි තත්ත්වයක්‌ උද්ගත විය.
වෛද්‍යවරයා ඝාතනය කිරීමේ සිද්ධියට සම්බන්ධ ප්‍රධාන සැකකරුවන් වන චැනල් සෙන්ටර් හිමිකරුට අයත් තුන්මහල් නිවසක්‌, පෞද්ගලික වෛද්‍ය මධ්‍යස්‌ථානය, එහි සේවය කරන හෙදියකට අයත් නිවසක්‌, වෙළෙඳසලක්‌ ගිනි තබා විනාශ කිරීමට ප්‍රදේශවාසීන් කටයුතු කර ඇත.
වෛද්‍යවරයා ඝාතනය කිරීමේ කොන්ත්‍රාත්තුව ලබාගත් සැකකාර යුද හමුදා කපිතාන්වරයාට අයත් කරන්දෙණිය කිරිබේද්ද ප්‍රදේශයේ පිහිටි විශාල නිවසක්‌ සහ සැකකරුගේ පියාට අයත් කුරුඳුගහහැතැප්ම නගරයේ පිහිටි විශාල වෙළෙඳසලක්‌ ද කලහකාරී පිරිස්‌ විසින් ප්‍රහාර එල්ල කර ගිනි තබා විනාශ කරනු ලැබීය.
නැවත පදිංචි කිරීමේ ඇමැති ගුණරත්න වීරකෝන් මහතා ඊයේ (01 දා) පෙරවරු 9.00 ට පමණ කරන්දෙණිය නගරයට පැමිණ වෛද්‍යවරයා ඝාතනය කිරීමේ සැකකරුවන් අත්අඩංගුවට ගැනීම පිළිබඳව ප්‍රසාදය පළකරමින් නගරවාසීන් සමඟ කතාබහ කර ඇත.
සැකකරුවන් අත්අඩංගුවට ගෙන නීතිය ඉදිරියට ගෙන ඒම පිළිබඳව ප්‍රසාදය පළකළ නගරවාසීහු රතිඤ්ඤා පත්තු කරමින් සතුටු වූහ.
ඇමැතිවරයා කරන්දෙණිය නගරයෙන් පිටව ගිය පසු එහි පැමිණ ඇති අතිවිශාල ජනතාවක්‌ වෛද්‍යවරයා ඝාතනය කිරීමේ සිද්ධියට සම්බන්ධ ප්‍රධාන සැකකරුට අයත් කරන්දෙණිය බොරකන්ද රෝහල අසල පිහිටි පෞද්ගලික වෛද්‍ය මධ්‍යස්‌ථානය වෙත ගොස්‌ ඇත.
ඒ වන විට වෛද්‍ය මධ්‍යස්‌ථානය දින කීපයක්‌ තිස්‌සේ වසා තිබිණි. එහි පැමිණි ප්‍රදේශවාසීන් වෛද්‍ය මධ්‍යස්‌ථානය වෙත ගල්මුල් ප්‍රහාර එල්ල කර ඊට ගිනි තැබූහ.
ප්‍රධාන සැකකරුට අයත් තුන්මහල් සුවිසල් නිවස පිහිටා තිබී ඇත්තේ වෛද්‍ය මධ්‍යස්‌ථානයේ සිට මීටර් 100 ක්‌ පමණ දුරින්ය. කලහකාරී පිරිස්‌ ප්‍රධාන සැකකරුගේ නිවස වෙත ගොස්‌ ඊට දැඩි ප්‍රහාරයක්‌ එල්ල කළහ. සිද්ධිය වන අවස්‌ථාවේ එම නිවසේ කිසිවකු හෝ සිට නැත.
නිවස තුළට කඩාවැදුණු කලහකාරී පිරිස්‌ ඊට පෙට්‍රල් ඉසිමින් ගිනි තැබූහ. නිවසේ ඇති වූ ගිනි ගැනීමත් සමඟම එහි තිබූ ගෑස්‌ ටැංකි කීපයක්‌ ද පුපුරා ගොස්‌ සුවිසල් නිවස එකම ගිනිජාලාවක්‌ බවට පත්විය.
මෙම සුවිසල් නිවස මීට වසර කීපයකට උඩදී ඉදිකළ එකක්‌ බවත් එහි වටිනාකම රුපියක්‌ කෝටි ගණනක්‌ බවත් ආරංචි මාර්ග පැවැසීය. නිවසේ කාමර සියල්ලටම වායු සමීකරණ යන්ත්‍ර සවිකර තිබූ අතර එහි තිබූ වටිනා භාණ්‌ඩ සියල්ල ද ගින්නෙන් පිළිස්‌සී ඇත.
මේ වන විට කරන්දෙණිය නගරයේ ඇති වී තිබූ උණුසුම් තත්ත්වය පාලනය කිරීමට පොලිසිය සහ පොලිස්‌ විශේෂ කාර්ය බළකාය දැඩි උත්සාහයක නිරත වුවද අතිවිශාල ජනකායක්‌ කලහකාරී ලෙස හැසිරීම නිසා එය ව්‍යර්ථ විය.
පසුව කලහකාරී පිරිස්‌ ප්‍රධාන සැකකරුට අයත් වෛද්‍ය මධ්‍යස්‌ථානයේ සේවය කරන හෙදියකගේ නිවසට ද ගල්මුල් ප්‍රහාර එල්ල කර ඊට ගිනි තැබූහ. හෙදියට අයත් වෙළෙඳසලකට ද පහර දුන් කලහකාරී පිරිස්‌ එය ද ගිනි තබා විනාශ කර තිබේ.
මෙහිදී කලහකාරී ලෙස හැසිරුණු පිරිස්‌ එල්ල කළ ගල්මුල් ප්‍රහාරවලින් නගරවාසීන් සිව්දෙනකු ද බරපතළ තුවාල ලැබූ අතර ඔවුන් රෝහල්ගත කරනු ලැබිණි.
කරන්දෙණිය නගරයේ මෙම ප්‍රහාරය එල්ල වෙද්දී තවත් කලහකාරීන් පිරිසක්‌ කිරිබේද්ද ප්‍රදේශයේ පිහිටි සැකකාර කපිතාන්වරයාට අයත් විශාල නිවසට ගිනි තබා විනාශ කළහ. පසුව එම පිරිස කුරුඳුගහහැතැප්ම ප්‍රදේශයේ පිහිටි කපිතාන්වරයාගේ පියාට අයත් වෙළෙඳසලට ද පහර දී ගිනි තැබූහ. පසුව සැකකරුගේ පියාට අයත් නිවසකට ද පහර දී ගිනි තබා විනාශ කිරීමට කලහකාරීන් කටයුතු කර ඇත.
කරන්දෙණිය ප්‍රදේශයේ ඇතිවී තිබූ කලහකාරී තත්ත්වය පාලනය කිරීමට පොලිසියට සහ විශේෂ කාර්ය බළකායට අවශ්‍ය යුද හමුදා කණ්‌ඩායම් කීපයක්‌ පිටත්කර යෑවීමට ද පියවර ගත් බව දකුණු පළාත භාර ජ්‍යෙෂ්ඨ නියෝජ්‍ය පොලිස්‌පති ලලිත් ජයසිංහ මහතා "දිවයින" ට පැවැසීය.
ඊයේ දහවල් වන විට කරන්දෙණිය නගරයේ ඇති වූ කලබලකාරී තත්ත්වය පාලනය කිරීමට පොලිසිය සමත් විය.
මෙම සිද්ධිය ආවරණය කිරීමට ගිය මාධ්‍යවේදීන් කීපදෙනකුට ද කලහකාරීන් පහර දුන් අතර ඔවුන්ට අයත් කැමරා උපකරණ කීපයක්‌ ද විනාශ කර ඇත.
http://www.divaina.com/2011/11/02/news01.
Picture preview
No comments:
Post a Comment