ශ්‍රී ලංකා වෛද්‍ය සභාවේ නව සභාපතිවරයා වශයෙන් මහාචාර්ය කාලෝ ෆොන්සේකා මහතා පත් කිරීම සම්බන්ධයෙන් වෛද්‍ය ක්‍ෂේත්‍රය තුළින්ම දැඩි විරෝධයක්‌ එල්ල වී තිබේ. මෙම විරෝධතාවයේ පෙරමුණ ගෙන සිටින රජයේ වෛද්‍ය නිලධාරින්ගේ සංගමය මහාචාර්ය ෆොන්සේකා විරෝධී සටන ඇරැඹුවේ ඔහුව පත් කිරීමට පෙර සිටමය. ඒ සඳහා විශේෂඥ වෛද්‍ය සංගම් 40 ක පමණ සහාය ලබාගත් වෛද්‍ය නිලධාරින්ගේ සංගමය මහාචාර්ය ෆොන්සේකා වෛද්‍ය සභාවේ සභාපති පුටුවට නුසුදුස්‌සකු බවත් වෙනත් සුදුස්‌සකු එම පුටුවට පත් කරන තෙක්‌ කලින් සිටි වෛද්‍ය සභා සභාපතිනිය වන මහාචාර්ය ලලිතා මෙන්ඩිස්‌ මහත්මියවම එම ධුරයේ රඳවා ගන්නැයි ජනාධිපති මහින්ද රාජපක්‍ෂ මහතාගෙන් පවා ඉල්ලීම් කළේය.
එහෙත් එම ඉල්ලීම් නිෂ්ඵල කරමින් ජනාධිපතිවරයාගේ නිර්දේශය මත මහාචාර්ය ෆොන්සේකාව ඉකුත් ජනවාරි පළමුවැනිදා වෛද්‍ය සභාවේ නව සභාපතිවරයා ලෙස පත් කෙරුණු අතර පසු දිනම (02 වැනිදා) ඔහු සිය ධුරයෙහි වැඩ භාර ගත්තේය.
වෛද්‍ය නිලධාරින්ගේ සංගමය විසින් මහාචාර්ය ෆොන්සේකා වැන්නකු වෛද්‍ය සභාවේ සභාපති ධුරයට පත් කළහොත් රජයේ වෛද්‍යවරුන් වෛද්‍ය සභාවේ ලියාපදිංචියෙන් ඉවත් වීම ඇතුළු වෘත්තීය සමිති ක්‍රියාමාර්ගයන්ට යොමු වන බව ඉකුත් දෙසැම්බරයේදී ප්‍රකාශ කර සිටි අතර ඒ පිළිබඳව සාකච්ඡා කිරීම සඳහා හදිසි විධායක සභා රැස්‌වීමක්‌ පසුගිය බ්‍රහස්‌පතින්දා රැස්‌ කිරීමට පවා පියවර ගත්තේය. එහෙත් එහිදී තීරණය කෙරුණේ ඉදිරි සතිවලදී මහාචාර්ය ෆොන්සේකාගේ පත්වීම පිළිබඳ අනෙකුත් පාර්ශ්වයන් සමඟද සාකච්ඡා කර ගත යුතු ඉදිරි ක්‍රියාමාර්ග පිළිබඳ විශේෂ රැස්‌වීමක්‌ කැඳවා තීරණය කිරීමටයි.
රජයේ වෛද්‍ය නිලධාරින්ගේ සංගමය හා විශේෂඥ වෛද්‍ය සංගම් මහාචාර්ය ෆොන්සේකාට එරෙහි සටනෙහි ඉදිරියෙන්ම සිටිනුයේ මාලබේ පෞද්ගලික වෛද්‍ය විද්‍යාලයේ නීත්‍යානුකූලභාවය හා ව්‍යාජ උපාධි සහතික ඉදිරිපත් කර වෛද්‍ය සභාවේ ලියාපදිංචිය ඉල්ලා ඇති බව කියන ලියාපදිංචි හා සහකාර වෛද්‍ය නිලධාරින් පිරිස සම්බන්ධ ගැටලුවලට රජයට වාසිදායක තීන්දුවක්‌ ඔහුගේ පත්වීම හරහා වෛද්‍ය සභාව විසින් ලබා දෙනු ඇතැයි උපකල්පනය කරමින් බව පෙනී යයි.
පසුගිය මාස කිහිපය තුළම අදාළ ගැටලු සම්බන්ධව ප්‍රසිද්ධියේ පෙනී සිටි වෛද්‍ය නිලධාරින්ගේ සංගමය එවැනි උපකල්පනයක්‌ මත කටයුතු කිරීමේ වරදක්‌ නැතැයි ඇතැමකුට සිතෙන්නට ඉඩ ඇත. එහෙත් වෛද්‍ය නිලධාරින්ගේ සංගමය මෙසේ මහාචාර්ය ෆොන්සේකා මහතාගේ පත්වීමට විරෝධය පළ කරද්දී එම පත්වීම හරහා නව සංකල්පයක්‌ මත පදනම් වූ වෛද්‍ය සභාවක්‌ බිහිවනු ඇතැයි තර්ක කරන වෛද්‍ය වෘත්තිකයෝ පිරිසක්‌ද සිටිති. සෞඛ්‍ය වෘත්තීය සමිති සන්ධානයේ සභාපති හෙද නිලධාරි සමන් රත්නප්‍රිය පවසනුයේ පසුගිය කාලයේ ශ්‍රී ලංකා වෛද්‍ය සභාව හරහා තම වෘත්තිකයින්ගේ ගැටලු සම්බන්ධයෙන් ලබා දුන් තීන්දු පිළිගත නොහැකි තත්ත්වයක පවතින බැවින් මෙම නව පත්වීම සන්ධානය අනුමත කරන බවයි.
වෘත්තියෙන් රජයේ වෛද්‍ය රසායනාගාර කාර්මික ශිල්පියකු (එම්.එල්.ටී.) වන දැනට සෞඛ්‍ය අමාත්‍යාංශයේ ජංගම වෛද්‍ය රසායනාගාර සේවාවේ වැඩ කටයුතු භාරව සිටින නිලධාරියා වන රවී කුමුදේශ් පවසනුයේද පසුගිය කාලයේ වෛද්‍ය සංගම්වල උවමනා එපා කම් මත ක්‍රියාත්මක වූ වෛද්‍ය සභාවේ සභාපති පුටුවට මහාචාර්ය කාලෝ ෆොන්සේකා වැන්නකු පත් වීමෙන් එම සභාව තුළ නව සංස්‌කෘතියක්‌ බිහි වනු ඇති බවයි. මහජනතාවගේ පාර්ශ්වයේ සිට තීන්දු-තීරණ ගන්නා විද්වතකු වීම නිසා ඔහුගේ පත්වීම තමන්ද අනුමත කරන බව කුමුදේශ් වැඩිදුරටත් කියා සිටී.
මෙසේ වෛද්‍ය සංගම් හා වෙනත් වෛද්‍ය සේවා වෘත්තීන් මහාචාර්ය ෆොන්සේකාගේ නව පත්වීම සම්බන්ධව පක්‍ෂව හා විපක්‍ෂව මත ඉදිරිපත් කරන ආකාරය අනුව පැහැදිලි වනුයේ වෛද්‍ය සේවාවේ ප්‍රමිතිය, ගුණාත්මක බව හා අයිතීන් සුරැකීම සඳහා ක්‍රියා කරන වෛද්‍ය සභාව හා එහි සභාපති ධුරය කොතරම් වැදගත් ආයතනයක්‌ද යන්නයි. මහාචාර්ය ෆොන්සේකාගේ පත්වීමට පක්‍ෂව අදහස්‌ පළ කරන සෞඛ්‍ය සේවා වෘත්තීය සමිති සන්ධානයේ සභාපති සමන් රත්නප්‍රිය පවා පවසනුයේ ඉදිරියේදී වෛද්‍ය සභාව ස්‌වාධීනව කටයුතු කරන්නේදැයි විමසිල්ලෙන් සිටින බවයි. එසේ එම සභාව ස්‌වාධීන අයුරින් ක්‍රියාත්මක නොවන බව පෙනී ගියහොත් එයට එරෙහිව කටයුතු කිරීමට පසුබට නොවන බවද ඔහු කියා සිටී.
සැබැවින්ම රජයේ වෛද්‍යවරුන් පමණක්‌ නොව හෙද, පරිපූරක ඇතුළු සෞඛ්‍ය වෘත්තීන් 50 කට අධික සංඛ්‍යාවක ප්‍රමිතිය සම්බන්ධව කටයුතු කිරීමේ වගකීම පවතින වෛද්‍ය සභාව ස්‌වාධීන ආයතනයක්‌ වශයෙන් ක්‍රියාත්මක වීම අත්‍යවශ්‍ය සාධකයකි. මහාචාර්ය ෆොන්සේකාගේ පත්වීම දේශපාලන පත්වීමක්‌ බවට පත් කරමින් ඒ හරහා තම අභිමතාර්ථයන් ඉටුකර ගැනීමට රජය කටයුතු නොකළ යුතු අතර එය ස්‌වාධීනව පවත්වා ගෙන යැමට අවශ්‍ය පියවර ගත යුතු බව අපගේ හැඟීමයි. එසේ කිරීමෙන් හා වෛද්‍ය සභාවේ පරිපාලනය සම්බන්ධව පැන නගින ගැටලු සෞඛ්‍ය ක්‍ෂේත්‍රයේ සෙසු වෘත්තීය සමිති සමඟ එක්‌ වී සාකච්ඡා මාර්ගයෙන් විස¹ ගැනීමෙන් වෛද්‍ය සභාවේ නව සභාපතිවරයාට එල්ල වී ඇති විරෝධතා මඟ හරවා ගැනීමට හැකි වනු ඇත.
වෛද්‍ය සභාව ස්‌වාධීන ආයතනයක්‌ අයුරින් ක්‍රියාත්මක නොවන්නේ නම් එතුළින් පැන නැඟීමට ඉඩ ඇති වෛද්‍ය වර්ජනයන් තුළින් සෞඛ්‍ය ක්‍ෂේත්‍රයම අරාජික තත්ත්වයට පත්වීමට ඉඩ ඇති බව බලධාරීන් අමතක නොකළ යුතුය.
ඒමන්ති මාරඹේ
Divaina 2012.01.08
No comments:
Post a Comment