එම අධිකාරිය විසින් නිකුත් කර ඇති මාධ්‍ය නිවේදනයකින් මේ බව කියා සිටින අතර එහි වැඩිදුරටත් මෙසේ ද දැක්‌වේ.
මහරගම පිළිකා රෝහලෙන් බැහැර කරනු ලබන අපජලය තුළින් ප්‍රදේශවාසී ජනතාවට අහිතකර විකිරණශීලී බලපෑම් ඇතිවෙතැයි පසුගිය සති කිහිපය තුළ මාධ්‍ය තුළින් හෙළිදරව් කළ අතර ඒ පිළිබඳව තමන් විශේෂ පරීක්‍ෂණයක්‌ සිදු කළ බවත්, අදාළ පරීක්‍ෂණ වාර්තාවක්‌ මේ වනවිට නිකුත් කර ඇති අතර පිළිකා රෝහලෙන් බැහැර කරනු ලබන අපජලයේ විකිරණශීලී අයඩින් මිශ්‍රවීමක්‌ හෝ ඒ මගින් ප්‍රදේශවාසීන්ට කිසිදු අහිතකර බලපෑමක්‌ හෝ සිදු නොවන බවට සනාථ වී ඇති බවත් පරමාණුක බලශක්‌ති අධිකාරිය පවසයි.
පසුගිය වකවානුව තුළ මේ පිළිබඳව දේශපාලනාධිකාරිය මෙන්ම ජාතික ජලසම්පාදන හා ජලාපවහන මණ්‌ඩලය, මධ්‍යම පරිසර අධිකාරිය සහ ජාතික පිළිකා ආයතනය මගින්ද විශේෂ අවධානයක්‌ යොමු කරනු ලැබීය. ඒ අනුව ක්‍රියාත්මක වූ පරමාණුක බලශක්‌ති අධිකාරිය, පිළිකා රෝහලෙන් බැහැරවන අපජලයෙහි විකිරණශීලී අයඩින් තිබේදැයි පරීක්‍ෂණයට ලක්‌කරනු ලැබීය. එහිදී අනාවරණය වූයේ මෙම අපජලයෙහි විකිරණශීලි අයඩින් ස්‌වල්ප වශයෙන් පවතින නමුත් නිසි පරිදි නව කාණු පද්ධතියක්‌ මගින් පිටවන මෙම අපජලය ජන ශූන්‍ය ප්‍රදේශයකදී මුදාහැරෙන බැවින් ඒ තුළින් ජනතාවගේ සෞඛ්‍යයට කිසිදු හානිකර තත්ත්වයක්‌ ඇති නොවන බවයි. පිළිකා රෝහලේ ඉදිකර ඇති අප ජලය ප්‍රමාද ටැංකිවල සිටි අපද්‍රව්‍ය ප්‍රතිචක්‍රීකරණ ඒකකය දක්‌වා සහ එම ඒකකයේ සිට ඇළ මාර්ගය දක්‌වා අප ජලය ගමන් කිරීමේදී යම් හෙයකින් පරිසරයට අයඩින් කාන්දුවීමක්‌ සිදුවෙතැයි අනුමාන කළ බැවින් ඒ සඳහා නව කාණු පද්ධතියක්‌ සකස්‌ කිරීමෙන් එම අවදානමෙන්ද ඉවත්වීමට හැකි වී තිබේ.
අදාළ අංශ සියල්ලෙහිම අවධානය මෙම පිළිකා රෝහලේ විකිරණශීලී අයඩින් පරිසරයට මුදා හැරීම කෙරෙහි යොමු වී ඒ පිළිබඳ පරීක්‍ෂණ සිදුකිරීම තුළින් ජනතාව තුළ මේ සම්බන්ධයෙන් යම් සැකයක්‌ පැවතුනේ නම් එම තත්ත්වය පහකර ගැනීමට හැකි වී තිබේ. වෛද්‍ය මතය අනුව විකිරණශීලී අයඩින් ශරීරගතවීම තුළින් වර්ධනය වන්නේ තෛරොයිඩ් ග්‍රන්ථියේ පිළිකා තත්ත්වයන් නමුත් මෙම ප්‍රදේශයේ ජනතාවට එවැනි තත්ත්වයක්‌ උද්ගතවී නොමැතිවීම තුළින් පිළිකා රෝහල අවට ජනතාවට 100% ක්‌ම තමන් විකිරණශීලී බලපෑමෙන් තොර බව තහවුරු කරගත හැක.
Divaina 2012.01.11
No comments:
Post a Comment