ඒමන්ති මාරඹේ
සෞඛ්‍ය ඇමැති මෛත්‍රිපාල සිරිසේන මහතා විසින් තම බලය අනිසි ලෙස යොදා ගනිමින් ශ්‍රී ලංකා වෛද්‍ය සභාවට අමතර සාමාජිකයන් දෙදෙනකු පත්කිරීමට විරෝධය පාමින් දැඩි වෘත්තීය සමිති ක්‍රියාමාර්ගයක්‌ දියත් කිරීමට තම සංගමය තීරණය කර ඇතැයි රජයේ වෛද්‍ය නිලධාරීන්ගේ සංගමයේ සභාපති වෛද්‍ය අනුරුද්ධ පාදෙනිය මහතා පැවසීය.
මෙම වෘත්තීය සමිති ක්‍රියාමාර්ගය පිළිබඳව තීරණය කිරීම සඳහා එම සංගමයේ විධායක කමිටුව හෙට
(19 වැනිදා) රැස්‌වන බවද පාදෙනිය මහතා කීවේය.
ශ්‍රී ලංකා වෛද්‍ය සභා ඉතිහාසයේ ප්‍රථමවරට එම සභාවේ නිශ්චිත සාමාජික සංඛ්‍යාව වන සාමාජිකයන් විසිපස්‌දෙනා (25) පත්කර තිබියදී සෞඛ්‍ය ඇමැතිවරයා විසින් අමතර සාමාජිකයන් දෙදෙනකු පත්කර ඇතැයි කී වෛද්‍ය පාදෙනිය මහතා එම සාමාජිකයන් දෙදෙනාගෙන් එක්‌ අයකු වසර කිහිපයකට පෙර පිළියන්දල ප්‍රදේශයේ පෞද්ගලික වෛද්‍ය විද්‍යාලයක්‌ ආරම්භ කිරීමට කටයුතු කළ අයකු වීම නිසා මෙම පත්කිරීම පෞද්ගලික වෛද්‍ය විද්‍යාල බිහිකිරීමේ සංකල්පයට සහාය ලබාගැනීම සඳහා සිදුකරාද යන්න සැක පහළ වී ඇතැයි සඳහන් කළේය.
ශ්‍රී ලංකා වෛද්‍ය සභාවේ සාමාජිකයන් විසිපස්‌ දෙනාගෙන් සෞඛ්‍ය ඇමැතිවරයාට පත්කිරීමට බලතල ඇත්තේ සාමාජිකයන් හතරදෙනකු වුවද නව පත්වීම් දෙකත් සමගම ඔහු සාමාජිකයන් හයදෙනකු පත්කර ඇතැයිද හෙතෙම කීය.
රජයේ වෛද්‍ය නිලධාරීන්ගේ සංගම් කාර්යාලයේ දී ඊයේ
(17 වැනිදා) පැවැති සාකච්ඡාවක්‌ අමතමින් වෛද්‍ය පාදෙනිය මේ බව සඳහන් කළේය.
Divaina 2012.01.18
No comments:
Post a Comment