එමන්ති මාරඹේ
ශ්‍රී ලංකාවේ බිහිවූ ජාතික ඖෂධ ප්‍රතිපත්තිය ලොව සෙසු රටවල් විසින් ක්‍රියාත්මක කරද්දී එය ක්‍රියාත්මක නොවන රටක්‌ වශයෙන් ශ්‍රී ලංකාව තවදුරටත් පැවැතීම කනගාටුවට කරුණක්‌ බව රජයේ වෛද්‍ය නිලධාරීන්ගේ සංගමයේ සභාපති වෛද්‍ය අනුරුද්ධ පාදෙනිය මහතා ඊයේ (05 දා) පැවැසීය. දැනට සකස්‌ කර අවසන් කර ඇති ජාතික ඖෂධ ප්‍රතිපත්තිය වහාම ක්‍රියාත්මක කිරීමට සෞඛ්‍ය බලධාරීන් විසින් කටයුතු කළ යුතු බව කී වෛද්‍ය පාදෙනිය දැනට රටට බෙහෙත් ගෙන්වීමේදී වැය කෙරෙන අතිවිශාල මුදල මෙන්ම මෙරටට ගෙන්වන බෙහෙත් ප්‍රමාණය ද සීමා කිරීමට එම ප්‍රතිපත්තිය හරහා අවස්‌ථාව උදාවන බව අවධාරණය කළේය.
වසර ගණනාවක්‌ මුළුල්ලේ ක්‍රියාත්මක කිරීම ප්‍රමාද වෙමින් පවතින ඖෂධ ප්‍රතිපත්තිය පෙබරවාරි මස අවසන්වීමට පෙර පාර්ලිමේන්තුව වෙත ඉදිරිපත් කරන බව සෞඛ්‍ය ඇමැති මෛත්‍රිපාල සිරිසේන මහතා විසින් ඉකුත් ජනවාරි මාසයේදී ප්‍රකාශ කර තිබිණි.
ඖෂධ ප්‍රතිපත්තිය ක්‍රියාත්මක කිරීම සෞඛ්‍ය අමාත්‍යාංශයේ වගකීමක්‌ බව පෙන්වා දෙන වෛද්‍ය පාදෙනිය රජයේ රෝහල් ගණනාවක අත්‍යවශ්‍ය බෙහෙත් වර්ග හිඟව පැවැතීම නිසා රෝගී ජනතාව දුෂ්කරතාවන්ට පත්ව ඇතැයි සඳහන් කළේය.
රජයේ වෛද්‍ය නිලධාරීන්ගේ සංගම් මූලස්‌ථානයේ ඊයේ (5 දා) පැවැති ප්‍රවෘත්ති සාකච්ඡාවකදී ඔහු මෙම කරුණු අනාවරණය කළේය.
Divaina 2012.03 06
No comments:
Post a Comment