ඒමන්ති මාරඹේ - ප්‍රදීප් සමරකෝන්
2000 වසරේදී වසරකට ලක්‍ෂ දෙක ඉක්‌මවූ මෙරට මැලේරියා රෝගීන්ගේ සංඛ්‍යාව මේ වන විට වසරකට දහසකට අඩු සංඛ්‍යාවකට සීමා කිරීමට හැකිවී ඇතැයි ජාතික මැලේරියා මර්දන ව්‍යාපාරයේ අධ්‍යක්‍ෂ වෛද්‍ය සරත් දෙනියගේ මහතා පැවැසීය.
හෙතෙම මේ බැව් පැවසුවේ මැලේරියාව පිටුදැකීම නිමිත්තෙන් ඊයේ (25 වැනිදා) නාරාහේන්පිට ජාතික රුධිර පාරවිලයන මධ්‍යස්‌ථාන ශ්‍රවණාගාරයේදී පැවැති මාධ්‍ය හමුවේදීය. 2011 වසරේදී ශ්‍රී ලංකාවෙන් වාර්තා වී ඇති මැලේරියා රෝගීන්ගේ සංඛ්‍යාව 175 දෙනකු තරම් අඩු මට්‌ටමක පවතින අතර මෙම වසරේදී මෙතෙක්‌ වාර්තා වී ඇත්තේ රෝගීන් 15 දෙනකු පමණක්‌ බව වෛද්‍යවරයා සඳහන් කළේය.
ගත වූ වසර දෙක තුළදී මෙරටින් වැඩි මැලේරියා රෝගීන් සංඛ්‍යාවක්‌ වාර්තා වී ඇත්තේ මුලතිව්, කිලිනොච්චි, මන්නාරම, වවුනියාව, මොණරාගල හා හම්බන්තොට යන දිස්‌ත්‍රික්‌කවලින් වන අතර 2014 වසර අග වන විට මෙරටින් මැලේරියා රෝගය සම්පූර්ණයෙන් තුරන් කිරීමට මැලේරියා මර්දන ව්‍යාපාරය ඉලක්‌ක කර ඇතැයිද හෙතෙම සඳහන් කළේය.
පොළව මතුපිට හිරු එළිය වැටෙන පිරිසිදු, නොගැඹුරු හෝ සෙමින් ගලා යන කුඩා ජල කඩිති, කෘෂි ළිං, අතහැර දැමූ ළිං, අතහැර දැමූ ගල් වළවල්, මැණික්‌ පතල්, ගඩොල් වළවල් ආදී ස්‌ථානවල මැලේරියා මදුරුවා වන ඇනෝµSලිස්‌ මදුරුවන් බෝවන අතර ආසාධිත මදුරුවකු දෂ්ට කිරීම මගින් කෙනෙකුට මැලේරියාව බෝවීම සිදුවේ.
උණ, හිසරදය, වමනය, ඇඟපත රුදාව, ඇඟ සුදුමැලි වීම මැලේරියා රෝගයේ රෝග ලක්‍ෂණයන්ය. මෙම රෝග ලක්‍ෂණයක්‌ හෝ කිහිපයක්‌ දක්‌නට ලැබේ නම් වහාම වෛද්‍ය ප්‍රතිකාර සඳහා යොමු විය යුතු අතර දිවයිනේ ඕනෑම ප්‍රධාන රජයේ රෝහලකින් හෝ ළඟම පිහිටි මැලේරියා මර්දන කාර්යාලයේ පිහිටි රසායනාගාරයකින් රුධිර පටල පරික්‍ෂාවක්‌ සිදු කර ගැනීමෙන් මැලේරියාව වැළඳී ඇත්දැයි තහවුරු කර ගත හැකිය.
මැලේරියාව බහුලව පවතින අප්‍රිකාව / ඉන්දියාව වැනි රටවල රැකියා සඳහා යන්නන්, අවදානම් වැඩි ප්‍රදේශවල ආරක්‍ෂක සේවයෙහි යෙදෙන්නන් හා මැණික්‌ පතල් ආශ්‍රිතව රැකියාවල යෙදෙන්නන් මැලේරියා රෝගයෙන් ආරක්‍ෂා වීම සඳහා රුධිර පරීක්‍ෂණවලට යොමු වීම අනිවාර්යයෙන් සිදු කළ යුතු බව වෛද්‍යවරු පෙන්වා දෙති.
මේ වන විට ලොව පුරා රටවල් 110 ක මැලේරියාව පැතිර ගොස්‌ ඇති අතර 2008 වසරේදී පමණක්‌ ලොව පුරා 863,000 ක්‌ මෙම රෝගයට ගොදුරුවී මිය ගොස්‌ ඇති බව වාර්තා වී තිබේ.
මෙම අවස්‌ථාවට සෞඛ්‍ය අමාත්‍යාංශයේ අතිරේක ලේකම් පාලිත මහීපාල, නියෝජ්‍ය සෞඛ්‍ය සේවා අධ්‍යක්‍ෂ ජනරාල් (මහජන සෞඛ්‍ය) වෛද්‍ය සරත් අමුණුගම, මැලේරියා මර්දන ව්‍යාපාරයේ ප්‍රජා විශේෂඥ වෛද්‍ය ගෞරි ගලප්පත්ති, කිලිනොච්චි හා මුලතිව් ප්‍රාදේශීය මැලේරියා නිලධාරී වෛද්‍ය තිලීපන්, සෞඛ්‍ය අධ්‍යාපන කාර්යාංශයේ අධ්‍යක්‍ෂිකා වෛද්‍ය ආර්. ඩී. එµa. සී. කාන්ති යන මහත්ම මහත්මීහුද සහභාගි වූහ.
Divaina 2012.04.26
No comments:
Post a Comment