ඒමන්ති මාරඹේ
නොවිසඳී පවතින සේවා ඉල්ලීම් තුනක්‌ මුල් කරගෙන දිවයින පුරා සේවය කරන සියලු මහජන සෞඛ්‍ය පරීක්‌ෂකවරුන් අද (25 දා) සිට දීප ව්‍යාප්ත අඛණ්‌ඩ වැඩ වර්ජනයක්‌ ක්‍රියාත්මක කරන බව ශ්‍රී ලංකා මහජන සෞඛ්‍ය පරීක්‌ෂකවරුන්ගේ සංගමය පවසයි.
අද සිට ක්‍රියාත්මක වන මෙම අඛණ්‌ඩ වැඩ වර්ජනය හේතුවෙන් සියලු මහජන සෞඛ්‍ය පරීක්‌ෂකවරුන් ඩෙංගු මර්දන කටයුතු හා හෝටල් ආපන ශාලා වැටලීමේ කටයුතුවලින් ඉවත් වන බව එම සංගමය කියයි.
මහජන සෞඛ්‍ය පරීක්‌ෂකවරුන් සඳහා නිල ඇඳුම් දීමනාව වශයෙන් රුපියල් 15.000 ක දීමනාවක්‌ ලබාදීම, රුපියල් 7,500 ක ඉන්ධන දීමනාවක්‌ ලබාදීම හා නාගරිකව රුපියල් 2,500 ක්‌ හා ග්‍රාමීයව රුපියල් 2,000 ක්‌ බැගින් වූ කාර්යාල දීමනාවක්‌ ලබාදීම යන ඉල්ලීම් මුල් කර ගෙන මෙම අඛණ්‌ඩ වැඩ වර්ජනය දියත් කිරීමට තීරණය වී තිබේ.
ඉකුත් 19 වැනිදා වන විට මුදල් අමාත්‍යාංශ බලධාරීන් සමඟ සාකච්ඡා කර අදාළ ඉල්ලීම්වලට විසඳුම් ලබා දෙන බවට සෞඛ්‍ය අමාත්‍යාංශය විසින් පොරොන්දු වුවද එය මෙතෙක්‌ ඉටු නොවීම හේතුවෙන් මෙම වෘත්තීය සමිති ක්‍රියාමාර්ගය දියත් කරන බව ශ්‍රී ලංකා මහජන සෞඛ්‍ය පරීක්‌ෂකවරුන්ගේ සංගමය පවසයි.
Divaina 2012.04.25
No comments:
Post a Comment