සෞඛ්‍ය අධ්‍යක්‍ෂවරියන් දෙදෙනකු විශ්‍රාම ලබා නිවෙසට යද්දී සිය කාර්යාලයේ තිබූ රුපියල් ලක්‍ෂ පහළොවක්‌ පමණ වටිනා ලැප්ටොප් පරිගණක කැමරා ඇතුළු උපකරණ කිහිපයක්‌ ද ගෙන ගොස්‌ ඇතැයි වාර්තා වෙයි.
මෙම අධ්‍යක්‍ෂවරියන් දෙදෙනාම වෛද්‍යවරියන් බව ද එක්‌ අයකු එක්‌තරා රෝහල් පද්ධතියක්‌ භාරව කටයුතු කළ බව ද සෞඛ්‍ය අමාත්‍යාංශයේ ප්‍රකාශකයෙක්‌ කීය. ඇය සිය කාර්යාලයේ තිබූ ලැප්ටොප් එකක්‌ සහ මේසය මත තබන පරිගණකයක්‌ නිවසට ගෙන ගොස්‌ ඇති බව ඉහත ප්‍රකාශකයා කීය. අනෙක්‌ වෛද්‍යවරිය සෞඛ්‍ය ආයතනයක අධ්‍යක්‍ෂවරියක්‌ ලෙස කටයුතු කර ඇති අතර කාර්යාලයේ තිබූ රුපියල් ලක්‍ෂ අටක්‌ පමණ වටිනා කැමරාවක්‌ විශ්‍රාම යද්දී ඇය විසින් රැගෙන ගොස්‌ ඇත.
මේ පිළිබඳ පරීක්‍ෂණ පැවැත්වූ සෞඛ්‍ය අමාත්‍යාංශය මෙම අධ්‍යක්‍ෂවරියන් දෙදෙනාගෙන් එක්‌ අයකුට විශ්‍රාම වැටුප් ගෙවීම අත්හිටුවා ඇතැයි ද අනෙක්‌ අධ්‍යක්‍ෂවරියට විශ්‍රාම වැටුප ගෙවීම අත්හිටුවීමට ඉදිරියේදී කටයුතු කරන බව ද ප්‍රකාශකයා කීය. මේ පිළිබඳ අමාත්‍යාංශ විගණන අංශයෙන් තවදුරටත් පරීක්‍ෂණ පවත්වන බව ද හෙතෙම සඳහන් කළේය.
Divaina 2011.11.05
No comments:
Post a Comment