තමනට හිමි මාසික දුරකථන දීමනාව නොගෙවීම සම්බන්ධව විරෝධය පාමින් බස්‌නාහිර පළාත් සභාව යටතේ පාලනය වන සියලු රජයේ රෝහල්වල වෛද්‍යවරුන් හෙට (16 දා) එක්‌ දින සංකේත වැඩවර්ජනයක්‌ ක්‍රියාත්මක කරන බව රජයේ වෛද්‍ය නිලධාරීන්ගේ සංගමය පවසයි.
මෙම වැඩවර්ජනය හෙට උදෑසන 8.00 සිට සවස 4 දක්‌වා ක්‍රියාත්මක කිරීමට නියමිතව ඇත.
දිවයිනේ සෙසු සියලු පළාත් සෞඛ්‍ය අධ්‍යක්‍ෂවරුන් විසින් එම පළාත් සභා රෝහල්වල වෛද්‍යවරුන් වෙත දුරකථන දීමනාව ගෙවීමට පියවර ගෙන තිබියදී බස්‌නාහිර පළාත් සෞඛ්‍ය අධ්‍යක්‍ෂවරයා පමණක්‌ එම දීමනාව වෛද්‍යවරුන්ට ලබාදීමට මෙතෙක්‌ පියවර ගෙන නොතිබීම මෙම වර්ජනයට හේතුවී ඇතැයි වෛද්‍ය නිලධාරීන්ගේ සංගමයේ උපලේකම් වෛද්‍ය සංකල්ප මාරසිංහ මහතා "දිවයිනZZ ට පැවසීය.
2010/09 දා නිකුත් කර ඇති චක්‍රලේඛයට අනුව රජයේ රෝහල් වෛද්‍යවරුන්හට මාසිකව දුරකථන දීමනා ගෙවිය යුතු වුවත් බස්‌නාහිර පළාත් සෞඛ්‍ය අධ්‍යක්‍ෂවරයා අඩුම වශයෙන් එම දීමනාවට අවශ්‍ය අයදුම්පත් හෝ සෞඛ්‍ය අමාත්‍යාංශ ලේකම්වරයා වෙත යොමු කර නැතැයිද, එකදු වතාවක්‌වත් බස්‌නාහිර පළාත් සභා රෝහල්වල වෛද්‍යවරුන්ට එම දීමනාව ලබාදී නැතැයි ද වෛද්‍ය මාරසිංහ මහතා අවධාරණය කළේය.
මේ පිළිබඳව විමසූ විටදී බස්‌නාහිර පළාත් සෞඛ්‍ය සේවා අධ්‍යක්‍ෂ කාර්යාල ආරංචි මාර්ග වලින් හෙළිවූයේ බස්‌නාහිර පළාත් සභාව යටතේ පවතින රෝහල් හා සෞඛ්‍ය ආයතනවල සේවය කරන වෛද්‍යවරුන් සඳහා දුරකථන දීමනාව ලබාදීමට වාර්ෂිකව රුපියල් මිලියන 120 ක මුදලක්‌ වැය වන බවත් අදාළ ප්‍රතිපාදන ලබාදෙන්නේ නම් එම දීමනාව ගෙවීමට කටයුතු කළ හැකි බවත්ය.
Divaina 2011.11.15
No comments:
Post a Comment