පිට පළාත්වල සේවය සඳහා යන විශේෂඥ වෛද්‍යවරුන් ඇතුළු රජයේ වෛද්‍යවරුන්ගේ දරුවන් එම පළාත්වල පාසල්වලට ඇතුළත් කර ගැනීමේ පහසුකම් සලසන තෙක්‌ කිසිදු රජයේ වෛද්‍යවරයකු මින් ඉදිරියට දුෂ්කර පළාත් ඇතුළු රටේ විවිධ ප්‍රදේශවලට යෑවීම නතර කිරීමට රජයේ වෛද්‍ය නිලධාරීන්ගේ සංගමය තීරණය කර ඇත.
හමුදා සේවාව ඇතුළු විවිධ සේවාවන් සඳහා දුෂ්කර පළාත් සේවයේ නිරත එම වෘත්තිකයන්ගේ දරුවන් එම පළාත්වල පිහිටි පාසල්වලට ඇතුළත් කිරීමේ පහසුකම් සලසා දී ඇතත් රජයේ වෛද්‍යවරුන්ට තම දරුවන් පිට පළාත්වල පාසල්වලට ඇතුළත් කිරීමේදී නොයෙකුත් දුෂ්කරතාවන්ට මුහුණ දීමට සිදුව ඇතැයි වෛද්‍ය නිලධාරීන්ගේ සංගමයේ උප ලේකම් වෛද්‍ය උපුල් ගුණසේකර මහතා ඊයේ (11 දා) පැවැසීය.
පශ්චාත් වෛද්‍ය උපාධි අධ්‍යාපනය සඳහා අනිවාර්යය විදේශීය පුහුණුව ලැබූ විශේෂඥ වෛද්‍යවරුන් ද විදේශයන්හි ඔවුනට හිමි වන සියලු පහසුකම් හැරදා තම මවුබිමෙහි සේවය සඳහා මෙරටට පැමිණ සතියකින් පමණ රජයේ අවශ්‍යතා මත රටේ විවිධ ප්‍රදේශවල සේවයට යොමු වන බව කී වෛද්‍ය ගුණසේකර මහතා එසේ පිට පළාත් සේවයට එන එම වෛද්‍යවරුන්ගේ දරුවන් එම පළාත්වල පාසල්වලට ඇතුළත් කර ගැනීමට නොහැකි වීම අවාසනාවන්ත තත්ත්වයක්‌ බව පෙන්වා දුන්නේය
මෙම තත්ත්වය මත බොහෝ විශේෂඥ වෛද්‍යවරුන් රට හැර යැමටත් පෙළඹී ඇතැයි ද පිට පළාත්වල සේවයට වෛද්‍යවරුන් නොයෑවීමට වෛද්‍ය නිලධාරීන්ගේ සංගමය ගෙන ඇති තීරණය මත දුෂ්කර ප්‍රදේශවල සෞඛ්‍ය සේවා බිඳවැටෙනු ඇතැයි හෙතෙම සඳහන් කළේය.
වෛද්‍යවරුන්ට පිට පළාත්වලදී දරුවන් පාසල්වලට ඇතුළත් කර ගැනීමේ ප්‍රශ්න පවතින බව සෞඛ්‍ය ඇමැතිවරයා හා අධ්‍යාපන ඇමැතිවරයා මෙන්ම සෞඛ්‍ය හා අධ්‍යාපන අමාත්‍යංශ බලධාරීන් පිළිගෙන ඇති බවත්, දරුවන් පාසල්වලට ඇතුළත් කර ගැනීමේ පහසුකම් සලසන තෙක්‌ රජයේ වෛද්‍යවරුන් පිට පළාත් සේවයට නොයෑවීමේ තීරණය එම බලධාරීන්ට දැනුම් දුන් බවත් වෛද්‍ය ගුණසේකර මහතා වැඩිදුරටත් සඳහන් කළේය.
කොළඹ රජයේ වෛද්‍ය නිලධාරීන්ගේ සංගම් මූලස්‌ථානයේ ඊයේ (11 දා) පැවැති ප්‍රවෘත්ති සාකච්ඡාවක්‌ අමතමින් ඔහු මෙම කරුණු අනාවරණය කළේය.
2011.11.12 divaina
No comments:
Post a Comment