ඒමන්ති මාරඹේ
රජයේ වෛද්‍යවරුන් ඇතුළු සෞඛ්‍ය ශ්‍රේණීන් කිහිපයකට ලබාදෙන ඇමතුම්, ඉන්ධන හා දුරකථන දීමනාවන් සිය වෘත්තිකයන්ට ද ලබාදෙන ලෙස ඉල්ලමින් පරිපූරක වෛද්‍ය සේවාවට අයත් වෘත්තීන් පහක්‌ මෙම 15 වැනිදා සිට සියලු රජයේ රෝහල්වල රාත්‍රි සේවා කටයුතුවලින් ඉවත් වන බව පරිපූරක වෛද්‍ය වෘත්තිකයන්ගේ ඒකාබද්ධ බලමණ්‌ඩලය පවසයි.
2006 න් පසු සෞඛ්‍ය සේවයේ ශ්‍රේණීන් කිහිපයක්‌ සඳහා පමණක්‌ අසීමිත ලෙස වැඩිකර ඇති ඇතැම් දීමනාවන් පරිපූරක වෛද්‍ය සේවාව සඳහා ද ලබාදිය යුතු බව එම බලමණ්‌ඩලයේ සභාපති හරේන්ද්‍ර කුරුප්පු මහතා පැවැසීය. මෙම තත්ත්වය මත පරිපූරක වෛද්‍ය සේවාවට අයත් රජයේ ඖෂධවේදීන්, විකිරණ ශිල්පීන්, භෞතවේදී චිකිත්සකයන්, වෛද්‍ය රසායනාගාර කාර්මික ශිල්පීන් (එම්. එල්. ටී.) හා වෘත්තීය චිකිත්සකයන් යන වෘත්තිකයන් 15 වැනිදා සිට සවස 4 න් පසුව රජයේ රෝහල්වල සිදු කෙරෙන රාත්‍රි සේවා කටයුතුවලින් ඉවත් වීමට තීරණය කර ඇතැයි කුරුප්පු මහතා කීවේය.
අදාළ දීමනාවන් ලබාගැනීම සම්බන්ධව මෙම 11 වැනිදා සෞඛ්‍ය අමාත්‍යාංශ ලේකම්වරයා සමඟ පැවැත්වෙන සාකච්ඡාව මගින් තම ඉල්ලීමට යහපත් ප්‍රතිචාර නොලැබෙන්නේ නම් 15 වැනිදා සිට රාත්‍රි සේවා කටයුතුවලින් ඉවත් වීමට තීරණය කළ බව හෙතෙම සඳහන් කළේය.
divaina 2011/11/05
No comments:
Post a Comment