කඩවත විශේෂ විජය ශ්‍රී ගම්මන
කැලණිය විශේෂ ලයනල් පී. පෙරේරා
ලක්ෂ 500ක් වටිනා තම පෞද්ගලික බූදලය තැලසීමියා රෝගීන් වෙනුවෙන් රෝහලක් පවත්වාගෙන යාමට සත්භාවයෙන් යුක්තව පිරිනැමීම හේමලතා මාලනී ආරියරත්න මහත්මියට නිවන් දකිනා පින්කමක් බව ශ්‍රී ලංකා නිදහස් පක්ෂයේ මහ ලේකම් සෞඛ්‍ය ඇමැති මෛත්‍රීපාල සිරිසේන මහතා පැවසීය.
ඒ මහතා එසේ පැවසුවේ කඩවත මහර සිරිමාවෝ බණ්ඩාරනායක මාවතේ පදිංචි හේමලතා මාලනී ආරියරත්න මහත්මිය සිය වටිනා නිවෙස ‘හේමාල්ස් තැලසීමියා සහන පියස’ නමින් විවෘත කිරීමෙන් අනතුරුව පැවති උත්සවයේදීය.
ඇමැතිවරයා මෙසේද පැවසීය. හේමලතා මාලනී ආරියරත්න මහත්මිය මාස කීපයකට පෙර දොස්තර විජේසුරිය මහතාත් සමග මාව හමුවෙලා රුපියල් ලක්ෂ 400 ක මගේ බූදලය සෞඛ්‍ය අංශයේ අභිවෘද්ධිය වෙනුවෙන් බාරදීමට කැමැත්ත දුන්නා. එදා ලක්ෂ 400 අද වන විට 500 ක තක්සේරුවක් කළ හැකියි.
බොහෝ දෙනා උත්සහ ගන්නේ තිබෙන ව්‍යාපාරය රැක ගැනීම සහ දියුණු කර ගැනීමටයි.
නමුත් මේ මහත්මිය සිදු කළේ වැඩි දියුණු කර රැකගත් දේ රෝගීන් වෙනුවෙන් කැපකිරීමේ උදාර කර්තව්‍යයක්.
ඒ වගේම එතුමිය මට කීවේ මිය යන්න කලින් මෙම ගෘහය වෛද්‍ය කටයුත්තක් සඳහා යොදා ගන්නව දැකීම එකම අභිලාෂය බවයි.
ඒ අනුව එතුමියටත් රටටත් අද අමතක නොවන දවසක් 11. 11. 11 යෙදෙන්නේ කලාතුරකින්.
එම දිනයේ තැලසීමියා රෝගීන් සඳහා උතුරු කොළඹ මහ රෝහලට අනුබද්ධව මෙය රෝහලක් වශයෙන් පවත්වාගෙන යෑම අදින් ඇරඹුණා.
මේ වෙනුවෙන් ජනාධිපතිගේත් මගේත් ජනතාවගේත් ස්තුතිය මෙන්ම පුණ්‍යානුමෝදනාවත් පිරිනමනවා.
රෝහල්වලත් ඇතමුන් වැඩ කරන්නේ මානුෂීය වගකීමකින් තොරවයි.
පැනඩෝල් විසිපන්දහසක් සැපයීමට ටෙන්ඩර් කැෙඳව්වම 2000ක් සපයලා 5000ක් වංචා කරනවා. මේ නිසා වහාම ඖෂධ පාලනයක් කළ යුතුයි.
සියල්ල අවුල් වෙන්නෙ නිසි කළමනාකාරීත්වයක් නැති නිසයි. ෆාමසි 10ක බැලුවම එකම ඖෂධය එක එක මිලට අලෙවි කරනවා. රෝගියා බෙහෙත් ගන්න ගියහම අතේ ගෙනගිය මුදලත් මදි.
ඇමැති මර්වින් සිල්වා මහතා
වෛද්‍ය වෘත්තිය කියන්නෙ කෙවිටක් අතට ගෙන කරන දෙයක් නෙවෙයි. මනුෂ්‍යත්වය ඉක්මවන වෘත්තියක්. කලකට පෙර මේ රටේ අය මැලේරියාවෙන් උණ සන්නිපාතයෙන් මිය ගියා. අවශ්‍ය බෙහෙත් නොතිබූ නිසා අද හැම රෝගයකටම අවශ්‍ය බෙහෙත් තිබෙනවා. අනාගතයේ තැලසීමියා රෝගයෙනුත් අපි ජයග්‍රහණය කළ යුතුයි.
හේමලතා මාලනි ආරියරත්න මහත්මිය
මේ නිවෙස හැදුවේ බිම් මහල හදල කුලියට දී එම මුදලින් පළමු මහල හදල දෙකම කුලියට දී ඒ මුදල්වලින් 3 වැනි මහලත් ගොඩනගල මෙය රෝගී ජනතාව සඳහා සෞඛ්‍ය අමාත්‍යාංශයට පිරිනැමීමට තීරණය කළා.
මහාචාර්ය අනුජ ප්‍රේමවර්ධන මහතා තැලසීමියා රෝගය බෝවෙන එකක් නොවෙයි. ජාන අනුව පරම්පරාවෙන් එන රෝගයක්. මේ රෝගය හැදුණ ළමයින්ට මාසයකට වරක් ලේ දිය යුතුයි. නැතහොත් මිය යනවා. කුරුණෑගල අනුරාධපුරය රෝහල්වල මේ ඒකක තිබෙනවා.
එදා අපි අපේ ගුරුවරුන්ගෙන් ඉගෙන ගත්තෙ මේ රෝගයට ප්‍රතිකාර නෑ. වයස 15 න් පසු මිය යනවා කියලයි. මේක මගේ සිත පෑරුවා. ඒ නිසා ඔවුන් රැක ගැනීමටත් ජීවත් කරවීමටත් මගේ හිත උනන්දු වුණා. අද වයස 15 පැනපු අයත් ප්‍රතිකාර ලබමින් ඉන්නවා.
Dinamina 2011/12/01
No comments:
Post a Comment